साइलीरिमै

स्वर/संकलन: धर्मराज थापा

साइलीरिमै
साइलीरिमै चौरी गाई
झर्‍योरिमै मधुवनैमा
उकालीमा जाँदा जाँदै दाइने पर्यो बर २
वनमा एक्लै गाई चराउने (काँ हो तिम्रो घर)२

वल्लो खोलो पल्लो खोलो कमिलाको गोलो २
बाह्रमासे फूलको सारी (मखमली चोलो) २

स्वर राम्रो कम्पनीको अक्षर राम्रो दामको २
कोई बोलेको माया लाग्ने (कोई त बिना कामको) २

हुक्का मेरो सानु सानु नली हात्ती हाडको २
यो त भाका ह्याँको हैन (पूर्वी पहाडको) २

हाम्रो तेन्जिङ

स्वर: धर्मराज थापा

हाम्रो तेन्जिङ शेर्पाले चढ्यो हिमाल चुचुरा
गम्केर बजा खैँजडी, झम्केर नाँच मुजुरा

सगरमाथि चम्किने नेपाल तारा तेन्जिङलाई
छक्कै परी विश्वले स्याबासी दिन्छ हेर भाइ
हाम्रो तेन्जिङ शेर्पाले चढ्यो हिमाल चुचुरा

चिसो हिमाल चुलीको तातो मुटु तेन्जिङ हो
हिमालचुली खानीको विश्वमा झल्कने रत्न हो
हाम्रो तेन्जिङ शेर्पाले चढ्यो हिमाल चुचुरा

सुनकोशीको मुलैमा दिलको तिर्खा मेट्यो हो
हिलारीलाई फुल्लाउदै लुकेका बाटा देख्यो हो
गाड्यो झण्डा तेन्जिङले विश्वको अग्लो धुरीमा

डाँफेचरी आएर पङ्ख खोली नाचे हुन्
हिमाल छोरो पाएर गौरीशंङ्कर हाँसे हुन्
हाम्रो तेन्जिङ शेर्पाले चढ्यो हिमाल चुचुरा

उँभो चुली कैलाशमा होइ पानी पिउनै पाएन
स्वर्गको शिर चुम्नलाई हार कत्ति खाएन
हाम्रो तेन्जिङ शेर्पाले चढ्यो हिमाल चुचुरा

धन्य वीर बहादुर औतार तैँले लिएको
नामको छोरो दुवै दिन बाँच्न जन्म लिएको
हाम्रो तेन्जिङ शेर्पाले चढ्यो हिमाल चुचुरा
चढ्यो हिमाल चुचुरा होइ चढ्यो हिमाल चुचुरा

हाम्रो तेन्जिङ शेर्पाले चढ्यो हिमाल चुचुरा २